Aizawl: Mizo hmeichhe zaithiam hriathlawh KC Runremsangi, Bawngkawn South, Aizawl chu Mizo hnam hla leh lam chawisan kawnga a thawhhlawk avangin art huangah Padma Shri dawng tura thlan a ni.
KC Runremsangi hi kum March 1, 1963 khan Serchhip district-a Keitum khuaah a piang a, a pasal, Lalthanmawia niin Bawngkawn South, Aizawlah an chhungkuain an cheng a ni.
Mizo zingah rimawi huang atanga Padma Shri dawng an la awm lo va, KC Runremsangi a hmasa ber tur a ni.
Art & Culture department-ah hnam lâm zirtirtu (dance instructor) niin Mizo hnam lâm chawisan kawngah a thawh hlawk hle a, Mizo folk singer hriat hlawh tak a ni bawk.
Folk music lama a thawh hlawk avangin kum 2017 khan India rama hetiang lama chawimawina sang, Sangeet Natak Akademi Award hlan a lo ni tawh.
Kuminah hian Padma Award zinga a sang ber Padma Vibhushan dawng turin mi paruk, Padma Bhushan dawng turin mi pakua leh Padma Shri dawng turin mi 91 thlan an ni.