AZL: January 25 thleng hian kumin chhungin drug vanga thi mi 10 an awm tawh.
Excise & Narcotics department chhinchhiah danin kumin January 25 thleng hian drug vangin mi 10 an thi tawh a, heng zingah hmeichhe pakhat tih loh chu mipa vek an ni.
Nikum chhung khan drug vanga thi hi mi 43 an awm a, mipa 37 niin hmeichhia paruk an ni a. Hetih lai hian kum 2021 khan drug vanga thi mi 47 awmin, nikum aiin thi an tlem zawk.
END hian kum 1984 atanga Mizorama drug vanga thi an chhinchhiah dan chuan kum 2004 hi drug vanga thi an tam ber tum niin mi 143 an thi a, mipa 122 niin hmeichhia 21 an ni.
Hetih lai hian kum 1986 khan drug vanga thi awm lo anga chhinchhiah a ni.
Kum 1984 atanga January 25, 2023 thleng khan drug vanga thi hi mi 1,746 awm tling tawhin, mipa 1,538 leh hmeichhia 208 an ni bawk.
END hian nikum chhung khan heroin kg 33.418 manin kum 2021 aiin a tam zawk a, nikum hmasa khan kg 18.906 an man.
END hian ruihhlo vangin nikum khan NDPS Act ‘85 hnuaiah mi 800 manin heng zinga mi 560 chu dan hnuaiah thubuai siamsak an ni a. MLP Act hnuaiah mi 4,165 manin, thubuai an siamsak zat erawh mi 5,045 a ni thung.
END-in nikum khan tualchhung siam zu litre 75,701.595 an man a, zu bilh lai tin 1,31,649 an tichhe bawk.