Manchester United in thla lehah Wembley a English Football League Cup final khelh an hnaih tawh hle a. Nottingham Forest lakah goal thum khungin dinhmun thaah an indah.
Nilaini zanah Carabao Cup semi-final hnuhnung zawk first leg hi khelh a ni a. United in The City Ground tlawhin bul an tan that rah an seng a, 3-0 in hnehna an chang.
United forward che tha tak Marcus Rashford chuan inrintawkna nen a inkhel thin tih lantirin minute ruknaah goal a khung nghal a, Forest tlarhnung lakah a khalh goal.
England forward hian World Cup zawhah match 10 khel tawhin goal 10 a khung tawh a. Europe a league sang panga atangin hetih chhung hian ani aia goal khung hnem an la awm lo.
United striker Wout Weghorst chuan halftime hma in a club thar tana a goal hmasa ber a khung a. Second half tawp dawnah Bruno Fernandes chuan an goal thumna a khung ve leh a ni.
Forest in football huaisen an khel ngam a, United tibuai ve fo mahse goal erawh an khung lo. Sam Surridge goal khung chu VAR hmanga endik a nih hnuah pawm a ni lo bawk.
Manchester United manager Erik ten Hag chuan a striker pahnihte a fak a. “Kheltha tam tak an awm karah Marcus-a inkhelah ka lungawi hle. Season tir atang khan hmasawn zawngin a la kal char char a. Ama thawhrah pawh a ni a, hma sawn zel se ka duh.” a ti a.
Weghorst chungchang sawi bawkin, “Goal a khung kha a pawimawh hle, kan inkhel hmasa lamah a tangkaina hmuh tur awm tawh mahse striker te tan goal khung hi a pawimawh bik thin.” a ti.