India ram danpui hman tanna ni champha, Republic Day chu nimin khan India ram pumah lawm a ni a, Mizoramah pawh he ni hi ropui taka lawm a ni.
COVID-19 vanga kum hnih chhung mipui huapa Republic Day lawmna hman a nih theih loh hnuah kuminah dan pangngaiin a huap zau thei ang berin lawm a ni a. Aizawlah chuan Sipai Lammualah lawm niin Larsap Hari Babu Kambhampati-a’n Hnam Puanzar pawtpharhin parade contingent-ten chibai an buk a chhang let.
Larsap chuan thuchah sawiin tlawmngai pawl hrang hrang, kohhran mite leh mipuite zarah sorkarin hmalakna lian tak tak hmangin state hmasawnna tur chak takin a thawk chhunzawm niin a sawi a. Sorkar flagship programe – Socio Economic Development Policy (SEDP) chu chak tak leh thatho taka kalpui mek a nih thu a sawi.
Sorkarin mipuite himna a ngaih pawimawh thu sawiin larsap chuan, “Dan bawhchhiatna zawng zawng khap zawh sen rual ni lo mah se, Mizoram police-te thawhrimna avangin Mizoram chu India rama state ralmuang berte zingah a tel,” a ti.
Sorkar hmalakna hrang hrang pawh sawiin MGNREGS hnuaiah job card nei chhungkaw 2,14,325 an awm thu leh chawhrualin ni 73.36 inhlawhna siamsak an nih tawh thu a sawi a. Mizoram PWD-in sorkar kum 2022-23 chhungin km 351-a thui formation cutting an zawh thu leh flexible pavement km 280.5 leh rigid-pavement km 212.5 an siam zawh hman thu a sawi a, lei dawh mek 12 a awm thu leh lei 16 dawh zawh tawh a nih thu a sawi.
PHE department-in November 24, 2022 thlengin state chhunga khawpui hrang hrangah tui connection 1,17,404 a pek chhuah tawh thu sawiin, Jal Jeevan Mission hnuaiah thingtlang khuaa in 94,269-ten tui in tur thianghlim, functional household-tap connection (FHTC) an neih tawh thu a sawi.
Larsap chuan doctor indaih lohna sukiang tura Mizoram sorkarin specialist doctor panga, medical officer pasarih leh dental surgeon paruk a lak thar thu pawh sawiin infiamna huanga thalaite tihhmasawn nan ruhrel eng emaw zat din leh sak zawh a nih thu a sawi a. Ruihhlo tawlh leh hman sual do kawngah Excise & Narcotics department-in rim taka an thawh thu te a sawi bawk.
Aizawla Republic Day lawmnaah hian KC Runremsangi, Bawngkawn South, Aizawl chu art lama a thawhhlawk avanga Padma Shri dawng tura thlan a nih thu puan a nih bakah Mizoram Police leh Excise & Narcotics-a hnathawk tha lawmman dawng turte hming puan a ni.
State khawpui, Aizawl bakah district hrang hrang khawpui leh khawpui dangah Republic Day hi lawm a ni a, Aizawlah leh district khawpuiahte chuan a lawmna hun hman zawhah larsap leh district bawrhsapten sawm bikte tan thingpui ruai an buatsaih hlawm bawk.