Dutch champion lai Ajax Amsterdam chuan an manager Alfred Schreuder chu tunhnaiah a zawna league game sarih chak nei lova an kal hnuah an ban.
Ajax hian table mawng lama a awm Volendam nen 1-1 a an inhnehtawk hnuah thutlukna hi an siam a. Point sarih in hmahruaitu Feyenoord chu an pha lo mek.
Schreuder hian nikum khan Manchester United pantu Erik ten Hag thlakin club hi a enkawl tan a. A hnuaia an chak hnuhnun ber hi November 1-ah daih khan niin 3-1 in Rangers chu UEFA Champions League-ah an hneh a. Nimahsela hemi hnu hian knockout stage thleng zo lovin Europa League-ah an tla thla.
Ajax chief executive Edwin van der Sar chuan, “Thutlukna siam hreawm tak a ni a, mahse a tul a ni si. Season bul tha takin tan mah ila tul lo tak taka point hloh kan ngah a, kan football khelh dan pawh a mumal lo a ni.” tiin thutlukna an siam chhan a sawifiah.
Ajax hian nipuiah khan winger Antony leh defender Lisandro Martinez te an hralh bakah striker Sebastien Haller, midfielder Ryan Gravenberch, left-back Nicolas Tagliafico leh defender Daley Blind te chu an chhuahtir a, Schreuder hian team thar a duang hlawhtling thei lo.