Australian Open a vawi kua champion tawh Novak Djokovic chuan kuminah a vawi 10-na atana champion theihna hun a nei dawn a. Tun tum tournament-ah vung taka a kal chu chhunzawmin final lut turin Tommy Paul a hneh chiang hle.
Zirtawpni a semi-final inkhelah kum 35 mi Djokovic hian a khingpui hi 7-5 6-1 6-2 in a hneh a. Set hmasa berah a che tha nghal mai lo tih bak chu buaina a nei lo.
Djokovic hian Paul a hneh avang hian record thar a siam a. Australian Open-ah men’s singles inelnaah a zawna vawi 27 a chakna a ni a, ani aia chak zawn hnem an awm lo.
Champion hnem record siamtu ni lai hi Pathianni hian a hlawhtling a nih chuan Grand Slam title 22 a lakna a ni anga, Rafael Nadal-a record chelhlai a tluk ang.
Pathianni final a chak zawk hi world rankings-ah number one thar a ni dawn bawk.
A chungnung e
Round hmasa lam inkhelah Djokovic hian hnehna chang turin harsatna a tawk mang lova. A mal veilamah hliam tenau a nei nia sawi a ni chungin a buai phah lo.
Khelmual pawn lamah erawh a buaina neih a kiam lo thung. Nikumah Covid 19 vaccine a lak duh loh avangin thawn haw a ni a. Tun tumah amah hi felfai vek mahse a pa Srdjan chu semi-final an khelh hma in Russia president Vladimir Putin thlawptute nen thla an lak hona a darh a, hei hian sawi zui a hlawh hle.
Court chhungah erawh Djokovic a chungnung hle a. Set hmasa berah tihsual neih zeuh zeuh awm mahse set a lak hnuah dan theih a ni tawh lova, darkar hnih leh minute 20 chhungin hnehna a chang.
A hmaah seeded no.3
Final khel turin Greek seeded number three Stefanos Tsitsipas a in vaw tling a. Fiahna hautak paltlangin Karen Khachanov chu 7-6 (7-2) 6-4 6-7 (6-8) 6-3 in a hneh.
Tsitsipas hi 2021 French Open final khan Djokovic nen hian intum tawhin a tlawm zawkah a tang a. Tun tum hi Australian Open final a luh vawikhatna niin Roland Garros a a tlawmna siamthatna hun a nei dawn.
Final-ah hian a hlawhtling a nih chuan kum 2018 hnua Melbourne Park-ah Djokovic ni lo champion thei hmasa ber a ni ang.
Kum 2019 a mipui hriata a invawrh kum leh 2021 leh 2022-ah te semi-final a thleng tawh a ni.