Nakuma KTP inkhawmpui lian thleng turin Ngopa a inbuatsaih mek a, nimin khan bialtu MLA, Dr. L. Thangmawia hovin Organising Committee, sorkar department hrang hrang aiawh, Ngopa VC leh NGO hrang hrang hruaituten Ngopa Presbyterian Kohhran Hall-ah inbuatsaihnate an thlirho.
Organising Committee Secretary C. Lalrosanga’n nakuma KTP inkhawmpui lian an thlen tur atana pawimawh leh tul hrang hrangte bialtu MLA leh sorkar department aiawhte hnenah a lo thlen a. Sorkar department aiawhten inkhawmpui lian atana an department inbuatsaih tawh dante leh an hmachhawpte an sawi ve bawk.
Bialtu MLA chuan kum 2024-a KTP inkhawmpui lian tluang taka Ngopa-in a thlen theihna turin ngaihtuahna senga a theih chin china tangho zel turin kalkhawmte chu a sawm a. Sorkar department hrang hrang aiawh officer-te pawh an hnathawh pangngai tibahlah si lova Ngopa khaw tana insawrbing turin a sawm.
Dr L Thangmawia chuan mihring lam inpuahchah piah lamah Pathian tanpuina nen Ngopa-in inkhawmpui hlawhtling tak a thlen theih ngei a rin thu sawiin, inhmuhkhawmnaa tel sorkar official-te chu an thiamna leh theihnate he inkhawmpui hlawhtlin nana hmanga organising committee-ten mamawh an hnena an thlen pawh a theih chin china ngaihtuahpui zel turin a ngen bawk.
Bialtu MLA ho hian nakuma KTP inkhawmpui lian pandal sakna tur hmun, Ngopa khelmual pawh an tlawh nghal a. Ruahmanna awm mek leh hmabak hrang hrangte an thlirho a ni.