Chinese President Xi Jinping chuan an ram chuan ‘mak tak maiin’ rethei lutukna an um bo ta tih a sawi.
A kaihhruai sorkar chuan kum riat chuang hret chhungin mi maktaduai 100 dawn chu retheihna atangin an kai chhuak hman niin a sawi.
Beijing-a hun hmannaah Xi chuan ‘hnehna pumhlum’ tia sawiin an ram chanchina hriat reng tur a nih thu a sawi.
Hetih lai hian mi thiam thenkhat chuan Xi-a sorkarin ‘rethei lutuk’ a tih chin chu eng nge tih an zawt hlawm a. China sorkarin ‘rethei lutuk’ tia a sawi chin hi kum khata $620 hlawh chhuak pha lote an ni.
Zirtawpnia thu a sawinaah Xi chuan ‘retheih uchuakna um bo tura hna hautak tak chu tihhlawhtlin a ni ta’ niin a sawi.
“Tuna kan tehna dinhmun atang chuan thingtlanga mi rethei mi maktaduai 98.99 chu an zavaiin retheihna ata chhanchhuah an ni ta a. Ram bial rethei 832 leh khaw 1,28,000 zet chu poverty list atangin thai bo a ni tawh,” a ti.
Kum 2012-a thuneihna a chan atang khan Xi-a hian retheihna um bo chu a thil tum lian ber a ni.
China hian nikum kum tawpah khan rethei ram bialte chu an list atangin an thai bo tawh tih an puang a, hei hi kum 2020-a retheihna um bo an tumna chu an hlawhtling tih a tar lang tih thuneitute chuan an sawi.