Aizawl: Congress party chuan an pisa-ah nimin khan Friday Political Session an nei. He hunah hian Prof. Zoengpari, Head, Department of Psychology, Mizoram University-in ‘Rilru hrisel tak nena ram kaihhruai leh hmalak dan turte’ tih thupui hmangin zirtirna a pe.
Prof. Zoengpari chuan mihring nun hona hrim hrim piah lamah politics khawvelah pawh rilru hrisel neih pawimawhzia a sawi a. Rilru hrisel chuan midangte nena inlaichinna leh inkungkaihna tha leh thuk tak a nei thin a, rilru hrisel lo chuan midangte nen inlaichinna tha an nei tak tak thei lo tih sawiin, “Rilru hrisel nei turin mahni nihna inpawm thiamna (self acceptance) atangin tan a ngai a. Mahni nihna inpawm thiam chuan a bula awmte pawh an nihna angin a pawm thiam a, a bula awmte, a thawhpuite pawh phurna tam tak a pe thin,” a ti.
“Mahni hnam leh ram zahawmna hum him leh chawisan kawngah rilru hrisel put a pawimawh a, chutiang rilru pu lo tan ram hruaitu tha nih a harsa,” tiin Congress party hruaitute chu ram hruaina kawnga rilru hrisel tak nei turin a fuih.
Congress party-in insiamthat tuma hma a lakna kawngah hian headquarter hruaitute rilru put hmang siamthat hi ngai pawimawhin, Revival Speaker-te, rawngbawltu pawimawhte leh mi thiam rualte zirtirna pe turin an sawm thin a ni.