Aizawl: March 2-a Mizoramin a thlen tur G20 Business-20 meeting atana inbuatsaihna hrang hrangte enfiah turin G20 Chief Coordinator Harsh Vardhan Shringla-a’n Aizawl a lo thleng.
Shringla hi Lengpui Airport-ah Tourism Principal Secretary Manisha Saxena leh state sorkar official ten an lo hmuak a, chief coordinator hi Ministry of External Affairs Additional Secretary leh financial advisor ni bawk, Vibhu Nayar leh sorkar laipui official-ten an tawiawm a ni.
Shringla hian Lengpui tum hmuna inbuatsaihna kal mekte chu enfiah nghal a, Business-20 meeting neihna tur, Mizoram University Auditorium leh Multipurpose Hall-te a enfiah bawk ang.
Nimin tlai khan MINECO-ah G-20 Core Team leh a hnuaia committee pengte thutkhawm a neihpui nghal a. Nizan khan Tourism Minister Robert Romawia Royte-in Chaltlang Tourist Lodge-ah mikhualin cultural programme bakah zanriah a buatsaihsak a ni.
Shringla hian vawiin zingah Chief Minister Zoramthanga a hmu ang a, Lengpui Airport atangin Mizoram a chhuahsan zui nghal ang.