India chuan hnara thlawk chi Covid vaccine hmasa ber a siam chhuak ta.
Bharat Biotech-in an siam, iNCOVACC hi hnara thlawr luh tura duan niin tihrawla natna dona khawl chu a tithatho thei a, chu chuan hnar atanga hrik lut thei tur a dang.
September, 2022 khan China chuan hip luh chi Covid vaccine hmasa ber chu a lo siam chhuak tawh a, hei hi kaa kah luh chi a ni.
Scientist-te chuan hnara thlawr chi vaccine-te hian hnar leh mihring taksa chung lama boruak chhuahna, taksaa Covid a hrik a luh duhna ber a tihchak theih a beiseiawm thu an lo sawi tawh thin.
UK leh US-a research team-te pawhin hnara phuh luh chi invenna chungchang hi an lo chhui chiam tawh.
November khan India-a damdawi viltute chuan iNCOVACC hi booster dose atana hman turin an lo pawm tawh a. A hmaa India-in puitling hnena emergency-a vaccine a pek tam pahnih, Covishied leh Covaxin zinga khawi maw zawk zawk dose hnih la tawhte pek atan an ti a ni.
December khan drug regulator-te hian vaccine pangngai atan an pawm zui leh ta bawk a ni.
Vaccine hi mi mal damdawi inah Rs. 800 man tur a ni a, sorkar damdawi inah erawh dose khat hi Rs. 325 man tur a ni a. A la duh chuan sorkar online platform-ah hauh lawk theih a ni a. Dose hnih hi ni 28 inkar dana lak tur a ni.
iNCOVACC hian a hmangtu taksa ralvengtute hnenah hri chu lo beih dan an zirtir dawn a. Vaccine-a adenoviruse an hman hi mihring taksa tana engmah pawi lo tur a ni.
Bharat Biotech Chairman Dr Krishna Ella chuan vaccine chu ‘awlsam taka lak theih’ a nih thu ANI news agency hnenah a sawi a, hriau leh inchiuna a ngai lo va, inchiu chi invenna aiin a hlawm liana siam chhuah pawh a awl zawk dawn niin a sawi.
India chuan invenna hi dose tluklehdingawn hnih chuang a pe tawh a. Indian 70% chuan dose hnihin an dawng tawh niin health ministry chuan a tar lang.
January, 2022 khan India hian damdawi ina thawk leh hri leng beihnaa hmatawnga thawkte hnenah booster dose a pe tan a, kum 60 chung lam, natna benvawn nei hnenah a pe bawk a. A hnuah erawh puitling zawng zawng tan a ti a, heti chung hian booster dose pek hi a chak lutuk thei chuang lo a ni.