Aizawl: Ningani zan dar 7:30 vel khan Khawzawl Hermon veng huam chhung, Tuimuk leh Lungvar road kawng chhak lam lei minin mi pathum delhin an thi vek.
Thudawn danin he kawnga retaining wall siam a nih laiin kawng chhak lei chu a min a, West Bengal lam mi hnathawktu mi pali awmin pakhat chu a insaseng hman a, insaseng hman ve lo mi pathumte chu leimin chuan chhilhin an thi a ni.
He leimina thite hi Raten Mandal (20); Alok Mandal (26) leh Prem Kumar Mandal (33) te niin an vai hian Mandal district, West Bengal mi vek nia sawi a ni.
Chhiatna thleng hi hriat a nih veleh Khawzawl DC CC Lalchhuangkima, SP Lalchhuanthanga, Nodal officer, DM&R Obed Lalmalsawma leh official dangten a hmun an pan nghal a. DC office hnuaia quick response team leh Khawzawl-a branch YMA hrang hrang member-ten he chhiatna thlenga vanduaite hi an buaipui a ni.
Thudawn danin ruang pathumte hi Ningani zan khan Khawzawl damdawi in mitthi dahnaah dah an ni a, nimin khan postmortem an nih hnuah an khuaah thawn an ni.