Myanmar-a kum hnih dawn liam taa thuneihna chhuh luitu sipaite chuan August thlaa an ram inthlanpui huaihawt a tumah inthlan dan khirhkhiap tak a siam thar a, political party-te tana chuh turin a harsa dawn hle a, an dan thar hian zawhna tam tak a siam leh ngei rin a ni.
Dan thar hian kum 2010-a an lo siam tawh chu a thlak dawn a, inthlan chu party emaw, candidate emaw, an telna pawl leh mi mal tupawh ‘firfiaka chetna nei’ tia an sawi emaw, ‘dan lova che’ an tih chuan an chuh thei dawn lo.
An ram inthlanpui chuh tum party-te chuan an inziah luh atanga thla thum chhungin member 1,00,000 tal an nei hman tur a ni a, Myanmar kyat maktaduai 100 ($45,500) tal an nei bawk tur a ni a, hei hi a hmaa mi let 100 chuang zeta tam a ni a. Heng pawisa hi sorkar hnuaia mi, Myanma Economic Bank-ah an dah lut ngei tur a ni bawk.
Dan thar hi sipai helnaa an hruaitu, Min Aung Hlaing chuan ziah hnanin sorkar enkawl Global New Light of Myanmar chuan Zirtawpni khan a tichhuak a ni.
Sipaite hian mipuiin an ram hruaitu atana an thlan, Aung San Suu Kyi chu manin February 1, 2021 khan thuneihna an chhuh lui a, hei hi a hma lawka an inthlana National League for Democracy-in chiang taka inthlana hnehna an chan nawn leh hnu lawk a ni.
General-te chuan finfiahna chiang tawk awm si lovin inthlan chu a dik tawk lo tiin an sawi a. Ram dang atanga chhuitute erawh chuan November, 2020-a an inthlan hi a zalenin a dik tawk tih an sawi ve thung.
Suu Kyi-i hi sipai court chuan dan bawhchhiaa puhin kum 30 chuang tang turin an hrem mek a, dan lova walkie-talkie kawl bakah ei ru-ah an puh bawk a, hengte hi politics-a a inhman zui theih tawh lohna tura an tihna nia ngaih a ni a. A kaihhruai party-a hotu lian dang, president paih thlak tak, Win Myint pawh lung in tantir a ni bawk.
Sipaiten thuneihna an chang leh ta hi khawvelin a dem a, United States leh ram dang tam takin an hrek zui a. Sipai sorkar chuan kum khat chhungin inthlan an huaihawt tha leh dawn tih an sawi a, hei hi February leh August, 2023 inkar velah an tinzawn nia ngaih a ni.
Inthlan dan thar an siamah hian chuh tum party chuan dan siam atanga thla hnih chhungin sorkarah an inziak lut tur a ni a, an tlai chuan pawm an ni dawn lo va. Party-te chuan dan thar hi an zawm famkim lo a nih chuan kum thum chhung hrem (suspend) theih an ni dawn a, a tul phei chuan sorkarin a thiat thei dawn.
Dan tharah hian party-te chuan inziah luh chungchanga election commission-in thutlukna a siam chu ngaihtuah tha leh turin an thlen thei dawn lo bawk.
Myanmar sipaiten an ram sorkar an paih thlak hnuah hian politics a buai hle a, anmahni duh lotute chu na taka chhang letin civil miten ralthuam lekin hnam bila hel pawl lo awm tawhte an zawm a, ramri velah an inkulh nasa hle.
Sipaiin thuneihna an chan leh atang hian mi 3,000 dawn thah an ni tawh niin Assistance Association for Political Prisoners chuan a sawi a. Sipaite dotu, ‘mi firfiak’ tia sorkarin a koh zinga mi sang tel man an ni tawh bawk.