NBA in thla thar a 2023 NBA All-Star Game a neih turah LeBron James leh Giannis Antetokounmpo te chu team pahnih captain an nih tur thu an puang.
James hi NBA All-Star team-ah a inlan vawi 19-na a ni dawn a, Kareem Abdul-Jabbar tlukin an pahnih hian inlan hnem ber an ni ang.
James hian tun season-ah a team che tha lo mahse mimal season ropui a hmang leh mek a. Abdul-Jabbar hi khumin NBA chanchin a point score hnem ber a ni teuh tawh.
Kum 38 mi ni tawh chungin tun season-ah 29.9 points, 8.5 rebounds leh 7.0 assists average a nei a. NBA in All-Star Game khelh dan a tih danglam atangin James hi team captain kum ruk chhung a ni tawh.
Lehlam captain tur Antetokounmpo hi a tum thumna atan a captain ve dawn thung a, kum 2019 leh 2020 khan captain ni tawhin All-Star team-ah a zawna season sarih a lanna a ni.
Milwaukee Bucks thiampuipa hian tun season-ah 31 points, 12 rebounds leh 5.3 assists average a nei a. A team hi Eastern Conference-ah pahnihna nihpui mekin kuminah champion tura rinkai zingah an tel a. NBA player zinga kumina tha ber pahnih zinga tel chiangah mi tam takin an ngai.
Western Conference atanga All-Star team a starter ni tura thlante chu – New Orleans Pelicans forward Zion Williamson, Denver Nuggets center Nikola Jokic, Golden State Warriors guard Stephen Curry leh Dallas Mavericks guard Luka Doncic te an ni a.
Lehlamah East lama starter turte hi Brooklyn Nets forward Kevin Durant leh a teammate Kyrie Irving te bakah Boston Celtics forward Jayson Tatum, leh Cleveland Cavaliers guard Donovan Mitchell te an ni.
NBA All-Star Game a starter ni turte hi vote hmanga thlan a ni a, fan vote chu 50% niin player leh media vote te 25% ve ve lak an ni thung.