Nikum (2022) chhung khan Champhai district Police-in ruihhlo leh a kaihhnawih thubuai 89 an ziaklut a, mi 118 manin, heng zinga 29 te chu ramdang mi an ni.
Champhai district level narco coordination centre (NCORD) committee thutkhawm nimina neiha tarlan a nih danin, nikum chhung khan Champhai Police ten Heroin hawng 2137 (gram 27800) man a ni a, tualchhung rate-a a hlut zawng Rs. nuai 641. 10 nia chhut a ni.
Methamphetamine mum 8,20,400 (kg 85.11), a hlut zawng Rs. nuai 1640.80 man hu manin, Crystal Methamphetamine kg 20, Rs. nuai 100 hu bakah Pseudoephe- drine mum 1,80,000 (kg 28.80), Rs. nuai 126 hu an man bawk a. Ruihhlo man zawng zawng hlut zawng hi Rs. nuai 2507.90 niin an chhut.
Nikum chhung vek khan Excise & Narcotics department, Champhai-in ruihhlo leh a kaihhnawih thubuai 88 ziaklutin, mi 108 an man a, an mi man zinga mi 19 te chu ramdang mi an ni.
Excise & Narcotics department, Champhai ten nikum chhung khan Heroin kg 10.27, tualchhung rate-a Rs. nuai 123.07 man, Methamphetamine mum 3,93,700 (kg 52.61), Rs. nuai 1181.10 man, Pseudoephedrine mum 8,896 (kg 1.24), Rs. nuai 53,376 man, Ganja kg 2.7, Rs. 6,750 man leh Alprazolam mum 1,298 (gram 140.65), Rs. 12,980 hu manin, an ruihhlo man zawng zawng hlut zawng hi Rs. nuai 1304.90 vel nia chhut a ni.
Kuminah nimin thleng khan Champhai Police chuan ruihhlo leh a kaihhnawih thubuai 6 ziaklut tawhin, mi 10 an man tawh a, an mi man zinga 3 te chu ramdang mi an ni.
Champhai Police te hian kuminah Heroin hawng 23 (gram 285.96) man tawhin, tualchhung rate-a Rs 6,90,000 hu nia chhut a ni a. Hawng 7 an man te chu Assam Rifles nena joint operation-a an man a ni. Ganja kg 6.35, Rs 9,525 man hu Assam Rifles nena tangkawpin an man bawk. Kumina Champhai Police te ruihhlo man tawh hlut zawng Rs 6,99,525 a ni.
Excise & Narcotics department Champhai-in kuminah ruihhlo leh a kaihhnawih thubuai 7 ziaklut tawhin, mi 11 an man tawh a, an mi man zinga mi 2 ramdang mi an ni.
Heroin hawng 74 (gram 895), Rs 1,79,000 hu nia chhut an man tawh a, heng zinga hawng 70 chu Assam Rifles nena joint operation-a an man a ni.