South Africa chuan India hnena sakei chi khat, cheetah 100 chuang thawn turin inremna an siam thu a puang a, hei hi Asia chhim lam rama spotted cat an chen lehna tura hmalakna a nih thu a sawi.
Environment ministry chuan cheetah 12 chu a hmasa ber atan thla tharah hian India-ah thawn luh an ni dawn tih a sawi a. Nikum September khan Namibia atangin cheetah pariat a thleng tawh bawk.
“Ruahman dan chuan kum tin kum riat atanga kum 10 chhung cheetah 12 zel thawn luh tum a ni,” a ti a, hei hian India-ah cheetah awm zat tipungin awm thartir leh tumna a tipuitling dawn niin ministry chuan a tar lang.
India hi tun hma chuan Asiatic cheetah hmunpui a ni thin a; mahse, kum 1952 atang khan a awm tawh a, hei hi an chenna hmun a riral nasat avang bakah a peltuten an thah nasat vanga puh a ni.
Khawsaktir leh tum hian hma lak niin kum 2020 khan India-a Supreme Court chuan African cheetah-te chu enchhinna atan ‘uluk taka an khawsakna hmun tur thlangin’ lak luh leh turin thu a titlu a ni.
South Africa nena indawrna kalpui chhung a rei hle a, a hmasa ber atan nikum August khan India panpui tumna ruahmanna siam a ni a. An thlen hunah khung hran phawt an ni ang.
Thuneitute chuan Namibia atanga lak luh cheetah-te hi khawmualpui dang atanga hmun danga sawn hmasak ber a nih thu an sawi.
Namibia atanga lak luhte hi New Delhi chhim lam km 320-a hla, Kuno National Park-ah chhuah an ni tawh a, hei hi an khawsakna hmun atana tha thlan a ni.