Aizawl : ZPM chhung inkhawm nimina neihah thu sawiin Aizawl South-I bialtu MLA C Lalsawivunga chuan mi tlemte inhai vurna lam kawnga ram rorelna a kal chu tha lo a tih thu a sawi.
C Lalsawivunga chuan ram inrelbawl danah mitin duhthu a sam loh avangin siamthat a ngai tih sawiin, “Ram siam that hna thawk tur chuan kan zavaiin mawh kan phur, chutah chuan kan zavaiin kan ralbang thei lo a. Politics tha ngaihtuah chungin, kan hma hun lo awm tura ngaihtuahna tha hmang tuin Zoram mipuite ka ngen a ni,” a ti.
Aizawl South-I bialtu MLA chuan party pahnih rorelna hnuaiah roreltute’n party atchilhnaah ram an hruai lut nia sawiin, “An party nih ve loh chuan engmah chanvo neihve lohnaah min hruailut a, mi tlemte te inhaivurna lam kawnga kan ram rorelna a kal hi a tha lo tak zet a ni,” a ti a. Party induhsak bikna hi rei tak kalpui a nih tawh avangin Mizo khawsak phung a tichhiat nasat tawh thu leh hmasawnna a khairual theih loh baka, rorelna tha a awm thei loh thu te, danin awmzia a neih loh thu te, mi harsatte dinhmun a tihchhiat bakah mi hausa leh rethei inkar a tihzauh phah niin a sawi.
C Lalsawivunga hian ramin chief minister tha, hruaitu tha a mamawh tih a sawi a. Chief Minister ni bawk, Finance Minister ni bawk, Party President ni bawk te hruaina hnuaiah mipui an kun a, mang a ang a, hemi lak ata talchhuak turin vote hmangin roreltu tha siam a tul a, ram kalphung dik lo siamtha tur hian Zoram mipui zawng zawng an sawm tih a sawi bawk.
ZPM Upa Committee chairman Rosiamhnuna Khawlhring kaihhruai inkhawmah hian Lalmuanpuia Punte pawhin thu a sawi a ni.