Hmeichhe inelna a seeded number 5 changtu Aryna Sabalenka chuan a Grand Slam singles title hmasa ber la in final-ah Elena Rybakina lakah ‘comeback’ hnehna a chang.
Inrinni chawhnu a final inkhelah kum 24 mi Sabalenka hian 4-6 6-3 6-4 in a khingpui hi a hneh a. Set hmasa zawk hloh mahse a beihletnaah a hlawhtling.
Melbourne Park a final inkhelah player pahnihten thahrui an ngahna an lantir a. Tennis huaisen khelin an ball vuak a na dun thei hle.
Sabalenka hian vuak sual nei tlem zawkin ‘risk’ a la fuh a. Vawi 51 vuak dik avanga point hmuh a nei.
Kazakh mi Rybakina hi Wimbledon champion lai a ni a, kuminah a Grand Slam title pahnihna la turin che tha tluang hle mahse a tawpnaah a ding chang zo lo.
Sabalenka hi round hmasa lamah a chesual teuh thin a, a final zinkawng hautak chu a champion hnuah sawiin, “Hetiang zawng zawng awih tur hian ni engemaw zah ka mamawh ang, sawi ngaihna ka hre lo. Rilruah thil tam tak a awm a, boruak ka zo lo ang tih ka hlau a, ka tlingtla thei ka lawm hle.” tiin a sawi.