Aizawl: Tun hnaia rorel lai MNF party-in member a nihna atanga an chawlh tir Siaha bialtu MLA Dr. K. Beichhua chuan Inrinni khan a biala Tisopi khua a tlawh a, Mara Chano Py (M.CH.P) ten an khaw kawtchhuahah an lo hmuak.
Tisopi Hall-a vantlang inkhawm buatsaihah thu sawiin Dr. K. Beichhua chuan, Tisopi khaw mipuite’n amah chawimawi a, ropui taka an lo hmuak chu lawmawm a tih thu leh, a hun tawn avanga amah tawrhpuitu zawng zawng chungah lawmthu a sawi.
Minister atanga a tlak avang emaw, MADC politics buaina chungchangah thiamthu sawi emaw, mi dang sawichhe tura a nih loh thu a sawi.
Siaha bialtu MLA chuan Tisopi khaw kawngah Siaha Youth Centre (SYC) tlawh nghal bawkin, SYC hi thalai a mamawh te tan counselling te, ruihhlo avanga harsatna tawkte chhawmdawlna atan te leh Gospel camping te an neih theih nan cheibawl tumin Ministry of Tribal Affairs-ah a project a bawhzui mek thu a sawi.
Dr. K. Beichhua hi MADC Chairman N Viakhu, MADC EM Education (P/S) S Lalremthanga, MADC Planning Vice Chairman N Lalrosanga leh party miten an tawiawm a ni.