ThawhTanni hian Congress party-in Rahul Gandhi hova ‘India ram inpumkhatna kawng zawh’ a huaihawt chu a tawpna an hmang dawn a. He hunah hian eptu party 12 zet an tel dawn.
Bharat Jodo Yatra kharnaah hian party 21 sawm an ni zawk a, thenkhat erawh venhimna lamah hlauhthawn an neih avangin an tel dawn lo.
Trinamool Congress, Samajwadi Party leh TDP te chu he huna tel lo tur langsar zual an ni.
MK Stalin-a kaihhruai, Dravida Munnetra Kazhagam (DMK); Sharad Pawar-a kaihhruai, Nationalist Congress Party (NCP); Tejashwi Yadav-a kaihhruai, Rashtriya Janata Dal (RJD); Nitish Kumar-a kaihhruai, Janata Dal (United); Uddhav Thackeray-a kaihhruai, Shiv Sena; CPI(M), CPI, Viduthalai Chiruthaigal Katchi (VCK), Kerala Congress, Farooq Abdullah-a kaihhruai, Jammu & Kashmir National Conference; Mehbooba Mufti-a kaihhruai, Jammu & Kashmir-a People’s Democratic Party (PDP) leh Shibu Soren-a kaihhruai, Jharkhand Mukti Morcha (JMM) te chu Srinagar-a hun hman turah an tel dawn a ni.
Congress General Secretary Priyanka Gandhi Vadra chuan Inrinni khan a nutapa, Gandhi-a hi Yatra-ah hian a zawm ve a. Zirtawpnia Chersoo khua, Awantipora atanga an chhuak tur venhimna lamah fel tawk lo a awm avangin an thulh chu an chhunzawm a. PDP chief Mufti-i pawhin Awantipora-ah yatra hi a zawm ve bawk.
Tual chhung police-te chuan venhimna lama fel tawk lo awm anga sawi chu an pha a. Additional Director General of Police (ADGP) Vijay Kumar pawhin venhimna a that tawk thu a sawi.
Congress President Mallikarjun Kharge chuan Zirtawpni khan Union Home Minister Amit Shah hnenah January 27-a Congress hruaitu, Gandhi-a venhimna felhlel awm chu ngaihtuah tur leh Jammu & Kashmir-a Bharat Jodo Yatra neih chhunga himna a awm theih nan amah ngei che chhuak turin a ti.
“Ni hnih lo awm leh tur chhung hian mi tam tak an pung khawm dawn a, January 30-ah Srinagar-ah hun hman a ni dawn bawk a. Congress hruaitu hlun leh political party pawimawh tak taka hruaitute an tel dawn bawk a ni,” tiin Kharge hian a ziak.
Kanyakumari atanga Kashmir thlenga kawng zawh hi September 7 khan tan niin January 30-ah Srinagar-ah khar a ni dawn ta a. Km 3,970 zet zawhin state 12 leh union territory pahnih paltlangin ni 145 vel hun hman a ni.