G-20 meeting a thlen tur atana Mizoram inpuahchah dan leh thil pawimawh hrang hrangte sawiin Chief Minister Zoramthanga leh Chief Coordinator Harsh Vardhan Shringla te chu Inrinni khan an inkhawm.
March 2, 2023 khian Mizoramin G-20 meeting hi a thleng dawn a. Hemi atana Mizoram sorkar inpuahchah dante enfiah turin Chief Coordinator Shringla leh a thawhpuite chuan January 27, 2023 khan Mizoram rawn thlengin, Inrinni zing khan CM Cabinet Meeting room-ah chief minister leh Shringla te chu inkawmin state dangten G-20 meeting an thlen tawh dan leh state hrang hrang inpuahchah dan te, Mizoram atanga an beisei te an sawi dun a ni.
He hunah hian India ramin G-20 a thlen turah hian khawvel mit hmuha ram hmasawnna leh India rama hmun leh hnam ziarang danglam tak takte pho chhuah a nih dawn avangin ngaih pawimawh an tih thu te, meeting nghahna tur khawpui hrang hrang cheibawl kawngah leh, khawpui infrastructure tihchangtlinna atana remchanna la tura ruahmanna siam tha an tih thute an sawi a ni.
Group of Twenty tih ni bawk, G-20 hi khawvel ram 19 – Argentina, Australia, Brazil, Canada, China, France, Germany, India, Indonesia, Italy, Japan, Republic of Korea, Mexico, Russia, Saudi Arabia, South Africa, Turkey, United Kingdom leh United States bakah European Union te an tel a. Kum tin G-20 member ramte hian presidency nihna an inchelh chhawk thin a, nikum khan Indonesia chuan presidency nihna chelhin kumin hian India-in a chelh ve thung.
G20 meeting neih a nih chhung hian India ram khawpui hrang hrangah neih a ni dawn a. Meeting pui ber, G20 summit chu September thla khian New Delhi-a neih tura ruahman a ni.
Aizawl a G20 meeting thlen tur hi B20 tia hming vuah niin, ‘multilateral business partnership session’-a hman tur a ni.