AZL: Chief Secretary Dr Renu Sharma hoin Zirtawpni zan khan Aizawl hmar lama Chite Luiin a luan tlang veng 16-a khawtlang hruaituten Chite Lui humhalhna chungchang an sawi ho.
Nikum lama Save Cite Lui Executive Committee thutkhawma an lo rel tawh bawhzuiin Aizawl Chanmari YMA Hall-a sawihona hun buatsaih a ni a. Inkhawmna hun hi hun hnihah then niin, hun khatnaah hi Dr. H. Lalruatsanga, Treasurer, Save Chite Lui Coordination Committee (SCLCC) in a kaihruai a. Chief Secretary Dr. Renu Sharma, Save Chite Lui Executive Committee Chairman ni bawk leh, Aizawl Bawrhsap Dr. Lalhriatzuali Ralte leh PCCF R. K. Singh ten thu an sawi a. Dr. Vanlalvenpuia, Joint Secretary, SCLCC chuan SCLCC-in Chite Lui chhanchhuah leh humhalhna tur atana hma an lak tawhna leh hma an lak mek dante a sawi.
Hun hnihnaah hi Rochamliana, General Secretary, SCLCC-in a kaihruai a. He hunah hian Local Council leh tlawmngai pawl hruaitute chuan Chite Lui chhanchhuah leh humhalhna kawnga an ngaihdan, beiseina leh rawtna te an sawi ho a. An sawihona a rawtnate chu a theih ang anga bawhzui tura chhinchhiah a ni.
Chite Lui humhalh chungchang sawi honaah hian Aizawl Central leh Aizawl South lam hrut zelin veng hrang hrangte tan thawh thum dang la nei leh thuai turin an inbuatsaih mek bawk.