- Lallunghnema, Charity Lodge
Chhuak hmasa lamah khan Scooty Two Wheeler inleisaknaa mi pakhatin harsatna tawh thu leh a umzui dan kan sawi a.Kha Scooty hralhtuin an scooty a hralh hnua, pawisa an pek kir tur thu kan tar lang bawk a nih kha. A nihna takah chuan Scooty neitu pa khan a chhe sa an zuar tur a ni lova, a hralh tur a ni hek lo. A Scooty chu a lo chhia a nih pawhin i he lovin chu pawisa chu a kir(returned) leh vat tur a ni.
Passenger-te hi consumer an nih thu ka sawi thin. Dikna leh chanvo in nei tih kan in hrilh bawk thin a nih kha. Taxi man uchuakte, bus fare dik lo te, maxi cab chuan man phuahchawp lutukte hi vantlang mipui pawikhawihna a ni ngei mai. Dan leh thupek kenkawh that loh avangin mipui kan dawihzep a, mipui kan huaisen thei lo. Tuna mipui dinhmun dik tak chu ‘a vaw tu in ek a cheh’ tih hi a ni.
Tun tumah hian Doctor pakhat an enkawl nawmnah(negligence) avanga Private Hospital hrem a nih thu tawi fel takin ka sawi chhuak dawn a ni. Mizoramah hian medical negligence avanga dam lote tuarna hi a tam hle mai a. Tun hnai lawk pawh hian treatment pek dik loh avanga damlote tuarna hi sawi tur a awm nual a ni. Mahse, hetih lai mek hian Mizo mipuite hi kan at luat avangin engmah kan buaipui peih lo va, kan tuar zar zar a.
Taxi passenger tam zawkin complaint kan thehlut ngam lova, bus conductor leh driver te lakah kan complaint ngai hek lo. MRP aia sanga thil lei an phun liam mai mai bawk a. Phun nawi bak kan ngam lo. Harhna tul lovah kan harhchhuak a, tul lo leh a phawvuakah kan huaisen. Eiruk kan hreh lo, sakhaw mi pawhin an eiru hreh hek lo. Sawi tur a tam lutuk a kan ang thinrim a, a tawpah eiruho kan tlawn leh tho. Kan inti fing a,kan fing zik tluak bawk si lo, engahmah kan intodelh lo rih zawng a nih hi!
Consumer issue leh right hriatna kawngah pawh kan sang lo em em! Kan nep hluah hluah ani ber! Pisa ba bu leh politician tam zawk lah hian consumer right zu hre hauh lova! Mak i ti ve em? Kei chuan mak ka ti tawp thei lo!
…..Tin, heti hi a ni a, khatia CAG International a ka thiante whatsApp ka en khan Saptawng thu deng khawng tak ka chhiar hlauh mai a. Ka han share teh ang che u.
Chu chu hei hi a ni “Fine of Rs. 1.25 crore imposed on private hospital for medical negligence” Mizo tawng chuan “Private Damdawi In pakhat chu inthlahdah avangin Rs. 1.25 crore chawitir an ni” tihna a ni awm e.
Kum 2014 khan Dr. Arunima Sen chu polycrystic ovarian syndrome avangin Kolkata khawpui a private hospital pakhatah a thi a. He hospital-ah hian enkawl a ni a. Heta doctor hian laparoscopy test ti turin thu a rawn a. A tirah chuan Dr. A. Sem chuan test tih a duh lova, mahse, test chu a ti ta tho ani. Test a tih hnu lawk hian heart attack(lungphu chawl) in a thi zui ta mai a. Dr. A. K. Sen pasal Somraj Sen chu a nupui thih chungchangah hian a lungawi lo hle a. He damdawi in a doctor 7 te lakah hian Alipur Police Station-ah Somraj Sen chuan complaint a thehlut a. Hetih rual hian National Consumer Protection Court-ah dikna a rorel beiseiin complaint a thehlut ta bawk a. Thiam a changing private damdawiin hi cheng nuai za sawmhnih panga chawi turin thutlukna a siam ta a. Medical Negligence tia puh an ni.
Hei bakah hian Consumer Court chuan Hospital chu complaint thehluhna atana senso cheng nuai 2 chu mitthi chhungte hnena thla 6 chhunga pe turin a ti bawk.
Sawi leh sawi hnu, Mizorama inti fing ho hian ti ve ngam tak maw le? Doctorte inthlahna avanga dam lote tuarna hi Mizoramah ngei pawh hian kan hre thin.Mahse,hmala ngam an awm si lo hi kan nepzia tichiangtu a ni!
I thil lei a i lungawi loh chuan min hrilh la, Mi tha leh zung i hmannaa i lawm loh chuan ngawi bo mai mai suh.
Kan lo tanpui ang che. Mahse, tlan chhe suh!
Consumer Advocacy Group i tan!