Pakistan-a hmun hnihah Pathianni khan chetsualna liantham tak thlengah mi 50 vel an thi.
Chhimthlang lama kawr thuk taka bus tlan liam, kang zui taah mi 41 vel an thi a. Hmarthlang lamah lawngleng chesual avangin naupang 10 vel tuiah an tla hlum bawk.
Dila chetsualna thlenga thite hi an vaiin lak chhuah an ni tawh a, naupang kum sarih leh 14 inkar mi vek an ni.
Bus chetsualna thlennaah ve thung chuan tual chhung thuneituten ruang eng emaw zat la chhuak tawh mah se ‘anmahni hriat hran an har’ niin an sawi.
Chetsualna hi chhim lama Balochistan Province-a Bela khawpui bul lawkah a ni a, lawngchawlhna khawpui, Karachi pana kal an ni.
Tual chhung thuneitu, Hamza Anjum chuan ruang 40 bakah hliam tuar mi pathum hmun an nih thu leh hliam zinga pakhat hi a hnu lawka a thih ve zui thu AFP news agency hnenah a sawi a. Mi dang pahnih pawh hi ‘an na hle’ tih a sawi.
Bus hian a tlan liam hmain leia tlak dalna intung chu na takin a su hmasa nia sawi a ni.
“Chetsualna thlen chhan hi kan chhui dawn,” tiin Anjum chuan a sawi a, thite chu tute nge an nih hriat theih nan DNA test pawh tih a ngai dawn tih a sawi bawk.
Afghanistan nena an inrina bul lawk, Khyber Pakhtunkhwa Province-a Kohat bul lawk, Tanda Dam dilah lawng chetsualna hi a thleng ve thung.
Tual chhung police hotu, Mir Rauf chuan naupang 10 an thih thu leh a dang 11 an chhanchhuah thu a AFP hnenah a sawi a, chhanchhuah zinga paruk chu an dinhmun a tha lo tih a sawi a. Mi dang pakua chin an la hre lo tih a sawi bawk.
Lawngah hian tual chhunga Islamic sikul, madrassa-a zirlai 24 chuang chuangin an zin khawthawng a, dil laia an awm laiin an lawng hi a let ta a ni.
“Chhanchhuah hna thawh mek zel a la ni,” tiin Rauf chuan a sawi.
Kohat Deputy Commissioner Furqan Khan chuan tun hma lamin dilah hian chetsualna a lo thlen fo tawh thu leh police pawhin intihhlimna lam hawia zin vel an lo khap tawh thin thu a sawi.
Tual chhung chanchinbu leh social media-a video thehdarhah chuan tuiah hian chhanchhuah hna thawktu eng emaw zat an la awm.