Spanish midfielder Pedri chuan substitute bench atanga dah luh a nih hnuah inkhela goal awmchhun a khung a. La Liga hmahruaitu Barcelona an team dangte nena an inkar ti zau zel turin 1-0in Girona an hneh.
Inrinni zanah Catalonia club pahnihte hi Estadi Montilivi-ah an inkhel a. Kum 20 mi Pedri hian minute 61-naah Jordi Alba cross chu goal-ah a khung a. Girona goalkeeper Paulo Gazzaniga chetsual zar a zo.
Barcelona tana vawi 100 a inkhelhnaah chiah goal a khung a, Blaugrana hi a zawnin league game vawi 9 tlawm lovin an kal tawh.
Poland striker Robert Lewandowski leh Spain forward Ferran Torres te tlarhmaah an chhawr theih loh an tuar a, an goal nawr a na tawk lo. An buaina belhchhah turin France winger Ousmane Dembele chu first half-ah hliam vanga lakchhuah a ngai.
Barcelona manager Xavi Hernandez chuan a team chakpuitu Pedri chungchang sawiin, “Pedri hi player dangte nen an inang lo, defence leh midfield inkarah hmunawl a zawng thiam hle a, goal a khung tel theih bawk avangin kum 20 mi lek niin khawvela midfielder tha ber zing ami a ni tawh.” tiin a fak.