Odisha Health Minister Naba Kisore Das chu Jharsuguda district, Brajarajnagar-a Gandhi Chowk bulah assistant sub-inspector-in silaiin vawi hnih a kap a, a dinhmun a tha lo hle.
Minister hi Pathianni chawhnu dar 1:00 vel khan programme-a tel tura a kal chu a awmah vawi hnih kah a ni a. Police officer kahna avang hian hliam na tak tuarin damdawi in panpui nghal a ni a, thlawhna hmangin Bhubaneswar panpui zui lehnghal a ni.
“Assistant Sub-inspector of Police (ASI) Gopal Das-a’n vawi hnih minister hi a kap a. Hliam tuarin damdawi in panpui nghal a ni,” tiin Brajrajnagar Sub-Divisional Police Officer Gupteswar Bhoi chuan thuthar lakhawmtute hnenah a sawi a. Das-a hi tual chhung miten manin police-in an kawl zui nghal tih a sawi.
Thil thleng hmutute chuan minister hi a lirthei atanga a chhuak chiah kah a ni tih an sawi a, beih a nih chhan hi hriat mai theih a la ni lo.
Video thehdarhah chuan Das-a awm atang hian thisen a chhuak nasa hle a, a lan danah nikhua a hre lo nghal a nih hmel a, car hma thutnaah dah luh lehnghal a ni.
Das-a hi vantlang pisa pakhat hawnnaa khual lian tur a ni a. A thlen chuan mi tam takin lo lawmin an lo bawm a. Thil puak ring tak hriat tur a zui a, “Hnai tak atanga a kah zawhah police pakhat tlan chhe lai kan hmu zui a ni,” tiin thil thleng hmutu pakhat chuan a sawi.
Odisha Chief Minister Naveen Patnaik chuan minister beihna chu a dem thu a sawi a, crime branch chu chhui nghal turin a ti.
“He vanduaina thleng hian mi a barakhaih hle a. Ka dem tak zet a, rang taka dam leh turin duhsakna ka hla a. Crime Branch chu a chhui hna thawk tura tih nghal a ni a. Crime Branch-a officer liante pawh a hmuna kal nghal tura tih an ni,” a ti.
He thil thlen hnuah hian khuaah hian boruak a sosang hman hle a, Das-a thlawptute chuan ‘venhimna felhlel awm’ chu an duh lo tih an lantir a. An zinga thenkhat chuan phiar rukna a awm niin an sawi.