Aizawl: BJP Mizoram State President Vanlalhmuaka chuan Mizoramin state a nih hnuah thuneihna changa sorkarna chelh tawh party pahnihte hian an intiam anga hma an lak ngai loh thu a sawi.
Inrinnia Mamit Bazar-a vantlang inkhawm an buatsaihah thu sawiin Vanlalhmuaka hian, inthlan dawna mipui hmaa manifesto a neihte chu BJP-in sorkarna a chan velah, manifesto kha mipuiin an thlan chhan anih avangin tipuitling turin kawng hrang hrangin hma a la thin tih a sawi a. “Mizoramah erawh, state kan nih hnuah Congress leh MNF party te’n min hruai tawh a, mipui hmaa Manifesto, a buin an siam a, an inziah that siak ringawt a; mahse, an manifesto anga hma la ta sorkar kan la nei lo,” a ti.
Vanlalhmuaka hian, inthlan hmaa cheif minister Zoramthanga kaihhruai MNF chu an manifesto-a SEDP cheng nuai thum aia tlem lo sem tura an intiamna chu kum li an sorkar hnuah pawh dawng tumah an la awm lo a, Rs 2,5000 hi chhungkaw tlemte hnenah an pe tawk nia sawiin, “Chuvangin, MNF President Pu Zoramthanga hian, mipui hma a a thutiam tam tak hi, a kum alo upat ve tawh avangin a lo haihawt san niin a lang,” tia sawiin, Mizoramin hruaitu haihawt lo a mamawh tawh avangin mipui tana intiamna ang a kal thin party BJP chuan kum 2023-ah Mamit bialtu MLA a neih ngei a rin thu a sawi.
Sawi chhunzawmin Vanlalhmuaka chuan Mamit district-in BJP MLA a nei a nih chuan aspirational district a nihna chu a mangtha tawh dawn tih a sawi a. “Mamit district mai ni lo, Mizoram pum hmasawn nan leh retheihna lak atanga chhanchhuah kan nih theih nan kum 2023 MLA General Election lo awm turah Mizoramah BJP sorkar a awm theih nan Mizoram mipuiten ngaihtuahna seng chungin BJP vote theuh turin ka sawm che u a ni,” a ti.