Aizawl: Aizawl North-III bialtu MLA Dr. Vanlalthlana chuan Inrinni khan a bial chhunga sorkar high school pahnih, Hrangchhuana High School leh Govt Republic High School zirlaite hnena intodelh zirtirna programme, TiLi Entrepreneurship Mindset Curriculum (TEMC), Tharthilthlentu nena thawhdunna an siam chu a kharna hun, Mission Veng, TiLi Office-ah a hmanpui.
Intodelh zirtir tur hian Indian Institute of Management (IIM) atanga zir chhuakte leh sumdawnnaa tawnhriat nei tawhte rawih niin chawlhkar tin school pahnihah hian tum hnih hun an hmang thin a. He programme-in a tum ber chu school syllabus zirtir ruala zirlaite intodelh tura buatsaih a ni.
Hrangchhuana High School leh Govt Republic High School naupangte chu intodelh thei tura kawng chi hrang hrang hmanga hrual an nih bakah group 26-ah thenin Rs. 2,000 theuh pek an ni a; an sum dawnte an peipun dan leh an kalpui dan chu intihsiakna atana hman a ni.
Zirlaite hian TiLi Office, Mission Veng-ah presentation pein a ti tha ber pakhatna Rs.10,000, pahnihna Rs.5,000 leh pathumna Rs. 3,000 pek an ni.