Sorkar hnuaia mi, All India Survey on Higher Education (AISHE) 2020-2021 chuan kum 2020-21 chhung khan India ramah zirna in sanga inziak lut zirlai vaibelchhe 4.14 an awm thu a tar lang a, a vawi khat nan vaibelchhe li a kai.
2019-20 aiin 7.5% laiin zirna in sanga inziak lut hi an tam zawk a, 2014-15 ai phei chuan 21% zetin an tam zawk.
Zirna in sanga hmeichhe inziak lut pawh an pung a, 2019-21 chhunga vaibelchhe 1.88 chu 2020-21-ah chuan vaibelchhe 2.01 an tling a, nuai 44 (28%) vel zetin 2014-15 aiin an tam zawk tih survey report-ah hian tar lang a ni.
Education ministry hnuaiah All India Survey on Higher Education (AISHE) hi kum 2011 atang khan neih ziah a ni a, India ram chhunga zirna in sang zawng zawng dinhmun leh ram pawn zirna in, India-a awmte dinhmun zir chianna a ni.
Survey-ah hian thil chi hrang hrang – zirlai inziak lut, zirtirtute dinhmun, hmunhma dinhmun, sum chetvel dan leh thil dang tam tak an la khawm thin.
A vawi khat nan AISHE 2020-21-ah hian zirna in sangte hian Department of Higher Education-in National Informatics Centre (NIC) puihnaa a siam, Web Data Capture Format (DCF) hmangin online-in an dinhmun an ziak lut thei tan a ni.
“Zirna in sanga inziak luh hi kum 2020-21 chhungin vaibelchhe 4.14 awmin 2019-20-a inziak lut, vaibelchhe 3.85 atangin a pung hle a. 2014-15 dinhmun aiin nuai 72 (21%) velin an tam zawk tawh a. Hmeichhe inziak lut pawh 2019-20-ah vaibelchhe 1.88 atangin vaibelchhe 2.01-ah kaiin 2014-15-a inziak lut aiin nuai 44 (28%) velin an pung a ni,” tiin education ministry chuan a sawi.
“Inziak lut zawng zawng zinga hmeichhe zat pawh 2014-15-a 45% chu tunah chuan 49% a ni tawh,” an ti bawk.
Survey-ah hian scheduled caste zirlai inziak lut pawh 2014-15 aiin 28%-in an tam tawh zawk tih tar lan a ni a, SC hmeichhia, zirna in sanga inziak lut pawh 38% zetin an pung a ni.
“Scheduled Tribe pawh zirna in sanga lut 47% zetin an pung a, ST hmeichhe inziak lut chu 63.4%-in an pung bawk,” tiin a sawi.