Minister kap hlumtua an puh, ASI Gopalkrushna Das-a hi rilru lama harsatna chi khat, bipolar disorder nei nia sawi niin psychiatrist-in a enkawl nghal mek.
Rilru lamah buaina a nei a ni tih hriat reng a ni chungin Das-a hian a service revolver chu dan anga la chhuakin minister a kahna hmun, Brajrajnagar-ah hian police post in-charge atan dah a ni.
MKCG Medical College & Hospital, Berhampur-a psychiatry department head Dr Chandra Sekhar Tripathy chuan Das-a hian bipolar disorder a neih ngei thu thuthar lakhawmtute hnenah a hrilh.
“Das-a’n ka clinic a rawn tlawh hmasak ber chu kum riat atanga kum 10 kal ta vel kha a ni tawh a. A thin a rim leh thut thut thin a, chumi chu kan enkawl a ni,” tiin Dr Tripathy chuan a sawi.
“Damdawi tha takin a ei em tih chu ka sawi chiang ngam lo va. Tha taka ei loh chuan he natna hi a lo lang leh mai thin a, min rawn tlawh hnuhnung ber atangin kum khat vel a liam tawh a ni,” tiin doctor chuan a sawi.
Bipolar disorder an tih hi rilru natna chi khat, rilru puthmang (mood) inthlak thut thut, a changa sosanga phur hluai atanga depression nei leh thut ang chi a ni ber a. A natna hi damdawi leh counselling nena enkawla tihdam theih a ni.
A nupui, Jayanti-i pawhin a pasal hian a rilru lam fel tawk lohna avangin damdawi a ei thin ngei thu a sawi a. “Kan awmna atanga km 400 vela hla daihah a awm si a, a ei tha em tih ka sawi ngam lo,” a ti.
Das-a hi Jaleswarkhandi, Ganjam district-a cheng a ni a. Police-ah hian constable atanga bul tanin Berhampur-ah a awm thin a, kum 12 kal ta khan Jharsuguda district-ah hian sawn a ni.
Jharsugda SDPO Gupteswar Bhoi chuan ASI hian Brajrajnagar-a Gandhi Chhak-a police outpost-a in-charge-a ruat a nih hnuah a pistol chu la chhuak tih a sawi.
Thuneitute chuan Das-a hi Pathianni khan minister-in a tlawhna tur hmunah hian dan leh thupek kengkawh tura tih a nih thu an sawi a. Minister a kah hma lawk hian a kahna hmun atanga mtre 50 vela hlaah a motorcycle a hung a ni.
Minister hi thiltih khawmna hmuna hun hmang tura a thleng, a car atanga a chhuk chiah chu a lo kap nghal a ni.
Silai hi vawi hnih a hmet puak a, mu khat chauhvin a fuh thung a. Tlan chhiat zui nghal a tum a; mahse, man nghal a ni tih police chuan an sawi.
“Tam hneh nghal em a ni a, thu zawh fiah turin hren nghal a ni,” tiin SDPO Bhoi chuan a sawi.
ASI-in minister a kah chhan hi hriat mai theih a la ni lo tih a sawi bawk.
Hetih lai hian thuneitute chuan Odisha Police Crime Branch-in health minister thahna thubuai hi an chhui zui mek tih an sawi.
Special Investigating Team dinin mi pasarih telna chuan an chhui a. An zingah hian cyber expert, ballistic expert leh Crime Branch-a officer an tel tih CB thuneitu pakhat chuan a sawi a. Ramesh Ch Dora, Deputy Superintendent of Police rank officer-in a ho a ni.
Helicopter hmangin chhuitu turte hian Jharsuguda an thleng tawh a. Arun Bothara IPS, ADGP, CID-CB chuan a tawiawm.
CID Crime Branch pawhin IPC section 307 IPC leh Arms Act section 27 tlawhchhanin thubuai an ziak lut bawk.