- Zirsangkima
He hla phuahtu hi tunge a nih ka hre chiah lo a; a hla phuah rilzia erawh ka hria! A satu, Lalnunsanga lah hian a sa nalh mangkhèng mai bawk si a. Maimitchhíngin ka ngaithla a; a hla thu hi ka phuah ni àwm zâwk taka mawi a ni.
A satu piah lamah a phuahtu hian a hla thu rem a duhtui hle mai a. Dik tak chuan, tunlai hian, i’n ti ve khangláng ila—hla thu kan duhtui tawh lohzia hi. Mahse, ‘Di Hlui’ hla thu hi chuan belh chian a dàwl a; sikulah hial zir tlâkin a phuah chhuak a ni.
Cháng khatna en ang:
A dai hlen ta emaw ka lo ti, hmana ka hmangaihna che,
An thamral ta emaw ka ti thin, nunhlui ngaihawm zawng pawh;
Mahse, i sakhmel ka tawn chángin kimte’n an lo thar leh thin.
I khiangawi hnu pawh hi e, ‘Di Hlui’ nghilh i lo har thin.
He hla phuahtu hian mi tin nun, kohhran upa e, zirtirtu e, mistiri e, kan nun min rawn phawrhsak a—a chhan chu, Di Hlui nei lo leh tawng nawn leh lo hi váng tak kan nia aw! Dai emaw, reh ta emaw kan tih tawh pawh kha, thar leh cháng hun a lo thleng leh thin. Khiangawiin léng tawh mah se, nghilh ngawt chu kan harsat tlàn hi maw le—zêp nâk emaw!
A thunawn hla thu fuhzia hi:
‘Thlangkhuandimin kar danah kan léng ta si a,’ a’n ti tê tê a; ’tian a’n chhunzawm a: ‘Tawn chang ni pawh hian biahthu hril a rem tawh lo!’ tiin. Rem tawh nang, a tih chi tawh loh! Mahse, ‘awm’ kha chu a la awm si a, a la nung tlat!
Hêng hi ka ti ve mai mai, nupaa insiam tawh hnua kan duh ber, Pastor-in kut min insuihtir thlap pawh ni mah ila, inthika inhauh nana hman chi pawh a niin ka hre lo. Di Hlui nei loa nupui pasal nei hi, váng deuh kan ni ang—inhriat thiamna chin neih a ngai … ka ti ve tlat!
A cháng hnihna hla thu a’n chheh mawizia hi:
Lenlai par tlana kan hlim lai kha, inthen leh hian kan mawi lo,
Mahse, chan tâwk khuarèl ang zâwkin kan lo inthen ta maw!
Nunhlui leh nang ngaih a rûk hlîra ka lo tuar dai tawh tur hi,
Ka dàwn khâwl chángin lei hringnun hi kei zawng a sei ka ti
A mawi a nia! Duh taka inkuaha, ‘Inthen lo’ng aw … ’ ti mawlh mawlh kha an han inthen ta si a. Mahse, he hla phuahtu hian a la then hlen thei lo chu a nih ber hi maw! Lei hringnun a hman tur pawh sei dáwn khawpin a hre hial mai a!
A cháng thumna hi tár lang leh ang:
‘Lunglai hal vànga inthen mah hian suihlunglèn thar ní an nei’ a’n ti thiam a; poetic word dik zaihin! He thu ringawt pawh hi mi tin awih, mi tin rin ngam, thu dik chiang sa, tu ma hnial ngam loh khawp thu dik a ni. Ka duh êm êm mai chu ‘Lunglai hal’ tih a rawn hmang chhuak hi a ni. Suihlung lèn thar ni chu an nei ngei ang … en zêl teh ang:
Duh tea táng laia pawm tawh hnu nghilh hi i har an ti;
Thinlai thar nite tam mah se, dam tea tuar tum zawkin,
Kumtluangin e, pawmlai D tawnah rinawm i tum zawk ang.
A va han fel tak êm aw—êm êma ! Heti khawp hian a Di hlui hi a ngai a, la duata la kuah a la thlahlel a; mahse, remchàn lohna remcháng tak avàng pawh a ni ang e, an inthen a. Mi sual tak chu ni se la, va bawh leh huam huam pawh a tum ang chu! Mahse, engtin nge a sawi : ‘Kumtluangin e, pawmlai D tawnah rinawm i tum zawk ang,’ zuk ti thei a. A tluan ka ring—he pa hi.
Mizo thu leh hlaah hian ngaihzawng hlui chanchin hi kan nei tlem khawp. He hla kan nei hian kan thu leh hla min tih hauhsaksak a; kan la hlut zual zêl ang. A satu, T Melody lam Lalnunsanga hian a sa fuh em em mai bawk si a—Mizo tana ro tling tur khawpin a nia a sak ni. Hawh u, he hla hi chu i hlut zual zêl ang u.