Aizawl : Chief minister Zoramthanga chu zirlaite’n Lunglei Zohnuaia Digital Planetarium leh Science Centre an hman tangkai thuai theih nan inrawlh turin MPCC General Secretary Joseph Lalhimpuia, ex-MLA-in ngen.
Lunglei District Congress Committee (LDCC) in nimina Congress Bhavan-ah Political Session an nei a. He huna thusawitu Joseph Lalhimpuia chuan, Congress sorkarah khan Lunglei Zohnuaia Digital Planetarium sakna atan NEC atangin Rs nuai 314 hmuh a nih thu leh, Science Centre sakna atan NEDP atangin Rs nuai 700 dah a nih thu a sawi a. He’ng sum hmang hian MNF sorkarin building-te sain, building pahnih an sak bakah hian building awmna hmunhma siam remna (landscaping) atan Ministry of Finance (SASCI) atangin Rs nuai 68 an hmu leh niin a sawi.
Joseph Lalhimpuia chuan, Rs nuai 68 hmang hian PWD-in a hmun siam rem hna hi thawh tumin hmanrua te pawh an lakkhawm vek tawh bakah, kut pawh an thlak hman tawh laiin nikum November thla atang khan MNF sorkar chuan department chu hnathawk theilo a siamin, Rs nuai 68 inchuha MNF sorkara thuneitu te an buai hi Lunglei district-a zirlaite tan a pawi a tih thu a sawi.
“Digital Planetarium leh Science Centre chu nikum December thlaa hawn tura ruahman tawh a nih laiin Rs nuai 68 inchuhna avangin tun thlengin hawn theih a la ni lo hi, zirlaite tan a vanduai thlak takzet a. Zirlaite’n a nih tur ang taka an hman tangkai thuai theih nan he thilah hian Chief Minister chu inrawlh thuai turin ka ngen a ni,” Joseph.Lalhimpuia’n a ti.