Himachal Pradesh-a Hamirpur district-a Nadaun sub-division chhunga khaw eng emaw zatah tui thianghlim lo in vang ni ngeiin mi 535 zet damlo an awm mek.
Banh, Jandgi Gujran, Jandali Rajputan, Panyala, Pathiyalu, Niyati, Rangas Chowki Haar, Thain leh Sankar khuaa mite hian tui atanga insiam natna an kai hlawm.
Rangas panchayat hotu, Rajeev Kumar chuan Pathianni chawhma lamah khan damlo hi mi 300 an tlin thu a sawi zet a, tlai lamah chuan an pung ta hle a. Mi thenkhat chu Hamirpur-a damdawi inah dah luh an ni.
Jal Shakti department-in tui a pek hmangtu chhungkaw tina pahnih thum vel zel an damlo tih a sawi.
Tuia bacteria tam lutuk avanga damlo ni bera an hriat thu Kumar-a chuan a sawi a. A khur chhungah natna hrik hi a insiam teuh nia an ngaih thu a sawi.
Khaw mite hian tui hi a tank tur sak lai atangin thlitfim lohvin an hmang mai a, hei hi hri pawh a pian leh a darh chhan nia ngaih a ni.
Naudan bialtu MLA, Chief Minister Sukhvinder Singh Sukhu chuan district thuneitute leh health department chu damlote a tha thei ang bera enkawl tur leh damdawite pawh tlachham miah lo tura tan la turin a ti.
State leh district-level-a agency-te pawh report kimchang siam turin a ti bawk.
Health department team chuan a tuartu khuate hi an thleng tawh hlawm a, Chief Medical Officer (Hamirpur) Dr RK Agnihotri kaihhruaina hnuaiah damlote an enkawl mek.
Jal Shakti department-a thawktute pawh che nghalin tui lakna chu titawpin a sample endik turin an la bawk.