UEFA Champions League khelh tum a bei mek Juventus an chesual leh a. Mahni mualah Monza lakah 2-0 in an tlawm.
Pathianni zana Allianz Stadium a Serie A inkhelah Massimiliano Allegri pawlte hi point 15 paihsak an nih hnuah an la che tha tluang hleithei lo.
Minute 18-naah Jose Machin ball tha pek atangin Patrick Ciurria chuan goal a khung a. Halftime hma in Dany Mota chuan an goal hnihna a khung.
Juve hi second half-ah insiamtha mahse Monza keeper Michele Di Gregorio chuan an goal khung tur a dansak nual.
Champion lai AC Milan pawh table mawng lam a awm Sassuolo in 5-2 in an sawp a. Match nga chhunga a vawi li nan an tlawm.
San Siro a inkhelah hian Sassuolo tan Grégoire Defrel, Davide Frattesi, Domenico Berardi, Armand Laurienté leh Matheus Henrique ten goal an khung.
Milan manager Stefano Pioli chuan, “Kumin atana kan Scudetto chu Champions League khelhphak hi a ni tawh.” tiin an dinhmun a sawi.
Hmahruaitu Napoli erawh an kal fal zel a, Victor Osimhen leh Giovanni Simeone te goal khung hmangin AC Roma 2-1 in an hneh.