Real Sociedad in nasa taka nawr an ni chungin an khingpuite an dang tluan hlawhtling a, Real Madrid nen goal inpe lovin an inhnehtawk.
Pathianni zana Santiago Bernabeu a inkhelah Real Madrid hian La Real goal-ah hian vawi 20 lai chance an nei a, mahse vawikhatmah an khung thei lo. La Real goalkeeper Alex Remiro chuan zan duhawm a hmang a, save ropui tam tak a siam.
La Real hian goal hlauhawm tum sarih chiah an nei ve thung a, hun tam zawk inven nan an hman a ngai chungin Real player-ten danglamna an siam thei lo.
Remiro hian Vinicius Junior goal khung tur tum hnih a dansak bakah Karim Benzema, Toni Kroos leh Rodrygo te goal khung tur a dang vek.
Real Madrid manager Carlo Ancelotti chuan point hloh leh mahse champion thei an la nih thu a sawi. “Point nga in kan hniam mek a, chuvangin vung taka kal ve tura kan thawh leh a pawimawh.”
“Barcelona an che tha hle a, mahse kawng thui tak kal tur a la awm. January hi a hautak a, mahse team in hma a sawn a, kan result pawh a tha chho leh thuai ang.” a ti.
Inkhel dangah second half-a Saul Niguez goal khung hmangin Atletico Madrid in 1-0 in Estadio El Sadar-ah Osasuna an hneh ve bawk.