Aizawl: ZPM Consultant W Chhuanawma chuan Mizoram mamawh chu sum ni loin thawhrimna a ni a, thawhrimna hmanga ram tun din an tum avangin ZPM hi mipuiten thlan tlin an duh tawh tih a sawi.
Nimina ZPM chhung inkhawmah thu sawiin W Chhuanawma hian Malaysia atanga an inlak hran hnuah Singapore chuan engmah lo atangin bul an tan a, kum 35 chhungin khawvel rin phak loh leh beisei phak loin hruaitu tha tak nen kalphung thar hnuaiah thawhrimna leh taimakna, thuawihna leh tanrualna hmangin ram thar dinin, tun dinhmun hi an thlen ta tih sawiin, “Singapore ang chiah hian Mizoram mamawh chu sum ni loin, thawhrimna a ni,” a ti.
ZPM chu thawhrimna hmanga ram tun din an tum avangin mipuiin thlan tlin an duh ve tawh a, hruaitu tha tak an nei bawk tih sawiin W Chhuanawm hian, “Kan Leader Pu Lalduhoma hian dik leh tha nia a hriatah chuan tlak pawh a huam a, a lamtangteah a buai ve ngai lo. Vawi tam tak a hlawhchham tawh a; mahse, a policy hi a la ngai reng. A kaihhruaina hnuaiah ram hmel thar kan hmu tep tawh a ni,” a ti.
W Chhuanawma hian ZPM ram mipui tam berte innghahna leh beisei awmchhun an ni mek a, Congress leh MNF ni lo sorkar, kalphung thara ram kaihruaitu tur mipuite hian an duh tawh niin a sawi a. Mizoram chu state a nih hnu kum 35 chhung chu party pahnihten an kaihruai tawh a; amaherawhchu, vawiinah erawh nau sawngnawi ang maiin rumna ngaiah mipui an la rum reng niin a sawi a. Mizoramah hian sorkar lai ninna (anti-incumbency wave) avangin sorkar lai thlak a ni thin a, tunah erawh sorkar tha duh tak takna avangin thlak a ni dawn a, chutiang tur chuan ram mipuite an insingsa mek niin a sawi bawk.