Aizawl: Congress party hruaitu, Rahul Gandhi hoa India ram chhunga intluk tlanna kawngzawh a huaihawt chu Mizoram Congress party pawhin nimin khan kawngzawh tawpna pualin hun an hmang.
Aizawl-a Congress Bhawan kawta hun hmanah MPCC President Lalsawta chuan he khawng zawh hi Mizoramah hlei hlei a pawimawh tih sawiin, Uniform Civil Code leh Citizenship (Amendment) Act, 2019-te hian Mizote hi a sirah a hnawl hret hret a, a luahlantu an awm chho mek zel a. Political party hrang hrang, kohhran leh NGO te tanrual a ngai takzet tih a sawi.
“Mizoram hi India ramah kan la awm miau avangin Mizoram mipuite tel lohna, Mizo hnam tel lohna India a kim thei lo a, India pakhat, Mizoram mipuite telna hi kan duh a ni,” a ti.
Gandhi-a hian Bharat Jodo Yatra tia vuahin, nikum September 7, 2022 atang khan Kanyakumari, Tamil Nadu atangin India ram chhunga thil man sang chak lutuk (inflation), hnathawh tur nei lo pung nasa lutuk (unemployment) leh sakhaw intluk tlanna (secularism) phutin kawngzawh bul a tan a. Jammu & Kashmir thleng kea kalin, ni 137 chhungin state 12 leh union territory pahniha district 47 paltlangin km 4,080-a thui kein an kal a. Pathianni khan kawngzawh hi zawh a ni.
January 29, 2023 khan Bharat Jodo Yatra kharna pui ber hi Lal Chowk, Clock Tower (Ghanta Ghar), Srinagar-ah hman ni a, Gandhi chuan India hnam puanzar a pawt pharh a, he hmunah hian kum 75 kal ta khan prime minister hmasa ber, Jawaharlal Nehru chuan India hnam puanzar a lo pawt pharh tawh a ni.
Kawng zawh kharna hun hi state hrang hranga Congress party-te pawhin anmahni hmun theuhah an hmang bawk.