Nimin khan MNF Legislature Party (MLP) chu Assembly House Recess Room A-ah an thukhawm a, assembly budget session neih turah Uniform Civil Code (UCC) duh lohna pass dan kawng dap an rel.
Chief Minister Zoramthanga hova thukhawm chuan UCC hmang tura hmalakna awm mek chu tha an ti lo va, assembly budget session lo awm turah lungrual taka a duh lohna pass dan kawng dap an rel a ni
SEDP chungchang pawh sawihovin a thawh khatnaah chhungkaw singruk hnenah first instalment chu a dawng tur chhung tin hnenah Rs 25,000 zela pek chhuah a nih tawh thu he thutkhawmah hian report a ni a. Second instalment pek leh tur pawh sanction a nih tawh thu leh a tahtawla sem chhuah thuai a nih tur thu report a ni bawk.
Chhungkaw singruk hnena SEDP pek mek bakah sorkar kumthar, 2023-24-ah chhungkaw dang tam tak, thawh hnihna leh thawh thumna thlenga thlan belh leh tura chak taka hmalak an rel.
MLP thutkhawm hian inkalpawhna kawngpui tha zawk Mizoramah a awm theihna turin MNF sorkar tirh atanga theihtawp chhuah a nih thu sawi lan a ni a. Nasa zawka tan lak chhunzawm an rel a ni.
Deputy speaker hmun ruak luahtu tur February 8, 2023-a thlan turah candidate atan Lawngtlai East bialtu MLA H. Biakzauva chu MLP thukhawm chuan an pawm bawk.
MLP thutkhawm zawhah hian Lawngtlai East bialtu MLA H. Biakzaua chuan Mizoram Assembly Legislative Assembly Commisioner & Secretary Lalhmahruaia Zote hnenah assembly deputy speaker thlan tur atana nomination paper a thehlut nghal.