United States chuan Myanmar sipaiten mipui rorelna paih thlaa anmahni duh lotute laka rawng taka an chetna an duh lohzia lantir nan kum 2013-a he ram nena sumdawnna lama inremna an siam chu a titawp rih vek.
US Trade Representative Katherine Tai chuan kum 2013-a sumdawnna leh investment lama inremna an neih chu Myanmar ramah mipui rorelna a awm leh hma chu an kalpui dawn rih lo tih a puang a.
February 1-a sipaiten inthlan result an pawm loh avanga mipui sorkar an paih thlak hnuah mipuiten nasa takin duh lohna an lantir a, hei hi sipaite hian tharuma chhang letin mi tam tak an thi tawh.
Rei tak sipai hnuaia an awm hnuah mipui sorkar dingin kum 10 emaw chauh an zalen a, tuna sipai bawkin thuneihna an chang leh hi mipuiten an pawm thei lo va, khawlaiah duh lohna an lantir zel.
Tai-i chuan Myanmar-a venhim hna thawktute chet dan chu an ram chuan a pawm thei ngang lo tih a sawi.