Newcastle United chuan Everton forward Anthony Gordon chu Pound maktaduai 45 vel ni thei turin an lalut fel.
Kum 21 mi Gordon hian kum 11 mi a nih atanga a zawm Everton hi a chhuahsan hma hian Chelsea pawhin nipui lai khan lakluh tumin an lo ngaihven tawh.
Magpies hian a manah Pound maktaduai 40 an pe phawt anga, Pound maktaduai 5 an pek belh leh thei ang.
A club thar a zawm hnuah Gordon chuan, “Min ngaihvenna ka hriat atangin Newcastle hi ka kalna turah ka ngai. Mi tam takin ka theihna tak tak an la hmu lova, ka phochhuah theihna tur hmun a ni.”
“Newcastle khua leh club tantute pawh hi ka mil zawng tak an niin ka hria a, manager hnuaia tuna an khelhdan pawh hi keimah mil tak niin ka ngai a, he club hian hlawhtling turin kawng dik a zawh mek niin ka hmu.” tiin a insawn chhan a sawi.
England Under-21 player Gordon hi left winger niin tlarhmaah leh dinglamah pawh khel thei a ni a, a tul angin attacking midfield-ah pawh dah a ni thin.
Kum 2017 khan first team tan khel tanin vawi 78 a inkhel tawh a, goal sarih a khung tawh.
Everton hian nipui lai khan Chelsea in lakluh an tumin a manah Pound maktaduai 60 an phut a, mahse thlasik laiin man tlawm zawkin an hralh ta zawk a ni.