Pakistani khawpui pakhat, Peshawar-a mosque-a bomb puakah mi 28 vel an thi.
Mosque-ah mi an khah vek laiin bomb hi a puak a, mi 150 chuang inhliam an awm.
A building hmun thenkhat chu a chhia a, thuneitute chuan mi eng emaw zat a chim hian a delh tih an sawi.
Bomb puah chhan hi hriat a la ni lo va; mahse, thuneitu pakhat chuan police-te bitum nia a lan thu leh thi zinga tam tak hi police an nih thu a sawi.
Venhimna lama thuneitute chuan bomb tipuaktu hi mosque chhunga tlar hma berah thuin a bomb pai a tipuak niin an sawi a. Eng pawl mahin an tihah an la chhal rih lo.
Peshawar capital city police officer Muhammad Ijaz Khan chuan bomb a puah lai hian helai hmun hnaivaiah hian police 300 atanga 400 vel an awm tih tual chhung chanchinbute hnenah a sawi.
Prime Minister Shehbaz Sharif chuan na takin a dem a. Thuchhuah a siamah Sharif hetiang thiltitute chu ‘Islam nena inkungkaihna engmah nei lo’ an nih thu a sawi.
“Ram pum hi hetiang firfiaka chetna lakah hian kan inpumkhat tlat a ni,” a ti.
An ram hmarthlang lam khawpuia bomb puak hi chawhnu tawngtai inkhawm hun lai, dar 1:30 (India-a chawhnu dar 2:00) vel niin Afghanistan nena an inrina bul lawk a ni.
Social media-a video thehdarhah chuan mosque bang chanve vel chu a kaw rul a. Leirawhchan a tla darh nuai a, a chim chhe karah himna zawngin an tlanchhe chum chum a ni.
Mosque chhungah hian chhanchhuah hna thawh mek a la ni a, ‘ruang tam zawk erawh lak chhuah a ni tawh’ niin Peshawar city deputy commissioner Shafiullah Khan chuan a sawi.
“Tuna kan hna ber chu a chim kara tangte dama lak chhuah a ni,” tiin Khan chuan a sawi.
Lady Reading Hospital thupuangtu, Mohammad Asim chuan hliam tuar zinga thenkhat chu an na hle tih a sawi.
“Emergency dinhmun dik tak a ni tak meuh,” a ti.
Peshawar-a Lady Reading Hospital hian emergency a puang a, hliam tuar tam tak an damdawi ina lak an nih thu leh thisen pe thei an awm chuan an mamawh reng tih BBC an hrilh.
Nikum March thla khan Peshawar-ah hian bomb tihpuah tawh niin Shia mosque-ah mi eng emaw zat an thi.
Khawpui ber, Islamabad Police chuan security high-alert tichhuak nghalin khawpui luh leh chhuahna zawng zawngah venhimna tihkhauh lehzual a ni.