Aizawl : Sorkar laipui hnuaia Ministry of Micro, Small and Medium Enterprises bultum ZOHANDCO leh Pearl School of Designing te tangkawpin puanthui leh a kaihhnawih zirna a buatsaih chu nimin khan ZOHANDCO chairman C Lalramawia’n a hawng.
Entrepreneurship Skills Development Programme on Garment Marking (Tailoring) hawnna inkhawm hi Pearl School of Designing, Zion Street, Aizawl-ah buatsaih niin, khuallian C Lalramawia’n thu a sawi.
C Lalrammawia hian, “Kuthna thawktute hi Pathianni mal a sawm thin, kan eizawnna kawngah malsawmna kan dawn zel theih nana pawimawh ber chu taimakna hi a ni, kut tling loa sum lak luh leh awlsam taka sum hmuh tumna hi kan hnualsuat zel a, thil tlo leh nghelnghet kan fate thlenga an chhawr tur kan kut leh ke hmanga hnathawh hi a hlu a, heti lama hmasawn tur hian kan intat hriam zel tur a ni,” a ti.
Sawi chhunzawmin ZOHANDCO chairman hian, “He skills development programme hi in tan a ni a, certificate chauh ni lo a hlawhtlinna pawchhuak turin theihtawp chhuah rawh u” tiin kalkhawmte a chah.
He training hi chawlhkar ruk (6) chhung neih tur a ni.