MNF party atanga Siaha bialtu MLA Dr. K. Beichhua chawlhtir nghawng nia ngaih theih tur thu kal zelah nimin khan Siaha district MNF party hruaitu mi eng emaw zatin an nihna leh primary member atangin bânna an theh lut.
Siaha atanga The Zozam Times thu dawn danin, bânna thehlut zingah hian MNF General Headquarters-a general secretary ni mek, Pakhu Hlychho, ex-MDC leh secretary pathum bakah adviser pakhat, chief organiser pakhat leh adviser hlui pakhat an tel.
MNF Unit atanga bânna theh lut zingah Thosai MNF Unit, Lobo-II leh New Siaha West-I chuan an unit pum puiin bânna an theh lut a, Vaihpi III MNF unit atangin Executive Member pakhat tih loh chu nihna nei chin an bâng vek bawk.
Anni bakah hian New Colony II MNF Unit president chuan unit-a nihna chanvo nei mi paruk a chhuahpui bawk a, Meisatla II Unit president pawhin a rualin a thawhpui nihna chanvo nei mi paruk a chhuahpui nghal bawk.
New Colony III unit president leh Lobo I Unit president-ten president an nihna leh MNF primary member an nihna atangin bânna an theh lut bawk a ni.
Nimina bânna theh lutte chuan MNF party chu awm zelna tlaka an ngaih loh thu tar langin, MNF unit bâng tate hian MNF District Headquarters, Siaha chu bân an tum thu an hriat lawk avanga an unit thiahna tur lehkha siamchawpa Pathiannia tichhuakah an puh a, heng lehkhate hi a takin an dawn loh thu leh WhatsApp kaltlanga an hmuh thu an tar lang.
Siaha MNF party chhung buaina kal zelah mi thahnem takin MNF atanga bân tum an la awm niin thudawnna hian a sawi bawk.
December 13, 2022 khan Siaha bialtu MLA Dr K Beichhua hian MNF sorkara Minister of States (AH&Vety, Excise, Social Welfare leh Sericulture) a nihna atanga Chief Minister Zoramthanga’n bânna theh lut tura a tih anga a bânna a theh luh hnuah January 25, 2023 khan MNF party atanga chawlhtir a ni leh a ni.
He mi nghawng kal zel nia ngaih theih turin Siaha district MNF president hlui, C Lawbei leh District MNF Adviser K Beisa, MDC hlui, bakah MNF Unit Siaha Vaihpi I leh Vaihpi II hruaitu, office bearer leh executive committee member-ten chawlhkar kalta tawp khan bânna an theh lut tawh a ni.