United States-ah Inrinni leh Pathianni khan hmun hnihah inkahna a thleng a. Florida-ah mi pahnih thiin mi 20 chuang an inhliam a, Toronto-ah mi pakhat thiin damdawi inah mi pali hruai an ni.
Pathiannia Miami, Florida-a concert neihna kawtah mi sual pathumin Miami Gargens kawta mipui pungkhawm an pawng kah a. Pawikhawihna thlen lai hian a buatsaihtute telin mi eng emaw zat an awm niin Miami-Dade Police Department (MDPD) chuan a sawi.
Nissan Pathfinder SUV chu concert neihna tualah hian dingin tu tih hriat loh mi pathum chu lirthei atang hian chhukin mipui awmkhawm chu an kap a, chumi zawhah motor-ah lut lehin an tlan bo nghal.
Chhanchhuah hna thawktute an thlen meuh chuan mi pahnih thi an awm hman tawh a, mi 20 chuang damdawi inah hruai an ni a, hliam na tak pakhat a tel niin police-te hian an tar lang.
MDPD Director Alfredo ‘Freddy’ Ramirez III chuan pawikhawihtute chu dawihzep taka silai an chelek chu a dem thu twitter-ah a tar lang.