German club Bayern Munich chuan thlasik bazar inkhar ni Thawhlehni khan Manchester City full-back Joao Cancelo chu loan in an hawh.
Kum 28 mi hian season tawp thleng Munich-ah hian football a khel dawn a. Nipuiah Bayern hian Euro maktaduai 70 a lei ngheh theihna an nei ang.
Kum 2019 a Juventus atanga Manchester City pantu Portugal international hian a insawn chhan chu inkhelh tam a duh vang a nih thu a sawi.
“Ka thutlukna hi tunhnaia ka inkhelh tam loh avanga siam ka ni a. Pep Guardiola nen kan inkar a tha vek lo angin thu a thang a, mahse ka inkhelh tam duh vang a ni.” tiin Cancelo chuan a sawifiah.
Manchester City hnenah hian nikum February thla khan kum nga contract thar a ziak chauh a, Etihad Stadium-ah kum 2027 thleng contract a nei. City tana Premier League match 98 khel tawh Cancelo chuan City atanga a chhuah hlenna tur a ni lo tih a sawi tel.
“Zinkawng thar ka zawh dawn a, bul tan thuai ka chak tawh hle. City a ka hun hman te kha nuam ka ti hle a, an hnenah contract ka la nei a, chuvangin ka chhuah hlenna turah ka ngai lo. Tunah chuan ka hma hun thla nga chhung val atan chauh ka rilru ka sawrbing rih anga, a bak chu kan hre chawp zel ang.” tiin a sawi bawk.
Tunhnai season hnih chhunga PFA Premier League Team of the Year a lang thei nimahsela World Cup zawhah vawi thum chiah bul a la tan a. Nathan Ake hmasawn leh rawlthar Rico Lewis chetthat avangin khelhna hmun a chang tam lo.