Aizawl: Lengteng biala rangva in la nei lote neihtir vekna tur, ‘Hlunsanga Malsawmna Scheme’ tia vuah chu nimin khan bialtu MLA Dr L Thangmawia’n Kawlkulha Hlunsanga (L) inah a hawng a, Minister Lalruatkima’n bultanna tur rangva thahnem tak a ruahmansak niin a sawi.
Dr. L Thangmawia chuan sorkarin UT hunlai atangin khawsak harsa zawkte tan scheme tam tak duangin hma tam tak lak ni tawh mah se, tun thlengin rangva in la nei lo an la awm nual nia sawiin, chung mite chu Phase I-a dah an nih thu a sawi.
Ngopa leh Khawzawl BDO-in a survey-ah Lengteng biala in ding lai 28 chu rangva in chung ni lo, a nih thu leh hmaih palh an awm pawhin telh belh zel an nih tur thu a sawi a. Party thliar lova hmalak nghal a nih tur thu leh kumin chhung ngeia Phase I zawh hman tum a nih thu L Thangmawia chuan a sawi.
He scheme-in a huam tel tho, rangva inchung tuiek thlak hna pawh kalpui tur a nih thu L Thangmawia chuan a sawi a. “Heng inte hi rangva chung khuh turin kaihhnawih dang tam tak a awm a, he scheme hlawhtlin nan khawtlang hruaitute leh NGO, a bikin YMA-te puihna a ngai dawn,” tiin an puihna a ngen a. “Lengteng bial mipuite nen kan tanho chuan he scheme hi a hlawhtling ngei ang,” a ti bawk.
Dr. L Thangmawia chuan Zofate independence puannaa hming sign-tute zinga mi, Hlunsanga (L), in sak la ding ngeiah ‘Hlunsanga Malsawmna Scheme’ hawnna hun an hman theih avanga lawmawm a tih thu a sawi a. He scheme hi kum 2025 thlenga kalpui tura ruahman a nih thu a sawi bawk a ni.