MZP hruaitute leh Aizawla College leh hnam bil zirlai hruaitute nimin tlaia thukhawmin January thla chhunga Mizoram Subordinate Services Selection Board (MSSSB) chairman bân tura sorkar an ngenna a hlawhtlin loh avangin February 1-ah MSSSB chairman pisa kai tur dan an rel a, sorkar atanga thu lawmawm an la hmu lo a nih chuan February 2-ah dan chhunzawma, an la hlawhtlin loh fo chuan February 3-ah kawngzawh an tum.
Zirlai hruaitute thukhawm chuan tun hnaia MSSSB-in hna a lakah hnam dang pathum an tel nia sawiin, he thilah hian MSSSB chairman chu a mawhphurtuah leh hnam tana ding tawk lova an ngaih thu an sawi a. A kaihhruaina hnuaia MSSSB hna lak awm zel tur chu ram leilung fate tan a him tawk lova an ngaih thu sawiin, January thla chhung ngeia MSSSB chairman thlak tura thuneitute an ngenna tihhhlawhtlin a ni lo chu hriatthiam har an tih thu an sawi a ni.