North Eastern Council (NEC)-in nimin khan Aizawl Sipai Lammualah an kum 50-na, Golden Jubilee an lawm a. Khuallian, Chief Minister Zoramthanga’n NEC vanga hmarchhak state-ten kawng hrang hranga hmasawnna an neih phah thin thu a sawi.
Chief minister chuan sorkar laipuiin India hmarchhak state-te tan, a bikin NEC atangin sum a pe chhuak thin tih sawiin, NEC chu hmasawnna sum thalna khur niin a sawi a. “NEC avang hian Mizoram leh hmarchhak state-ten kawng hrang hrangah hmasawnna kan neih phah hi a ropui hle,” a ti.
India hmarchhak state zingah Mizoram chu state lian ber leh mipui tam berna ni lo mah se, state dangte entawntlakin a siam theih tih Zoramthanga chuan sawiin, “Mizoram chu lehkhathiam rual awm khawmna, khawtlang inpumkhat leh tanrualna ram a ni,” a ti a. Rinawmna leh inhmangaihah te, tlawmngaihnaah te state dangte entawn ni zel tura tan la turin ram mipuite a sawm.
NEC Golden Jubilee lawmna pui ber chu nikum December 18 khan an hmunpui, Shillong-ah Prime Minister Narendra Modi hova hman a ni tawh a, hmarchhak state hrang hrangah NEC Golden Jubilee lawmna hun hi hman chhoh leh mek a ni.
Nimina Aizawla NEC Golden Jubilee lawmnaah hian Mizoram State Planning Board Vice Chairman H Rammawi, Planning Secretary Lalmalsawma Pachuau leh Mizoram State Sports Council Secretary John |anpuia te pawhin thu an sawi a, Jubilee lawmna pualin tug-of-war (inhruipawh)-a inelna buatsaih niin, Aijal Club-ah Larsap Dr. Hari Babu Kambhampati jubilee puala symposium neih a ni bawk.