Indian court chuan mahnia thlarau lam puithiam (guru)-a inchhal chu amah zuitu zinga mi pawngsual avangin dam chhung lung in tang tura hrem a ni.
Asaram hi kum 2001 leh 2006 inkar khan Gujarat-a a awmhmun, ashram-ah vawi tam tak a khawih nia puhin thiam loh chantir a ni.
Kum 81 mi kum 2018 khan tleirawl kum 18 mi pawngsuala puhnaa dam chhung tang tura hrem a lo ni tawh bawk.
A dan hre mi chuan court-in thutlukna a siam thar hi a khing let dawn tih a sawi.
Yoga leh pathian biakna lama hriat hlawh Asaram hian zuitu maktaduai tel neiin khawvel hmun hrang hrangah ashram a nei bawk.
Gujarat-a thuneitute chuan Thawhlehnia court-in hremna a puan dawn avangin a zuituten chet an thawh mai hlauvin venhimna khauh takin an kalpui.
A hma niin Gandhinagar-a court chuan Asaram hi Indian Penal Code section hrang hrang hmangin thiam loh a chantir tawh a, heng zingah hian mi pawngsual leh dik lo taka mi hrenga puhna pawh a tel.
He thila puh ve dang paruk, Asaram nupui leh a fanu telin, finfiahna tha tawk a awm loh avangin thiam chantir an ni.
Court chuan lung in tan bakah hian Rs. 23,000 chawi tur leh a tuartu hnenah zangnadawmna Rs. 50,000 pe turin a ti bawk.
Mipat hmeichhiatna kawnga puhna hi kum 2013-a hmeichhe pakhatin guru laka thubuai a thehluh atanga intan a ni.
Hmeichhia hian Asaram hian Motera khawpuia a ashram-ah vawi tam a pawngsual niin a puh a, a tlansan theih hma kum nga zet a tuar niin a insawi.
Kum 2019 khan Asaram fapa, Narayan Sai chu he hmeichhe laizawn (a nau) pawngsuala puhnaah thiam loh changin dam chhung tang tura hrem a ni tawh bawk.
Asaram hi kum 2013 khan a zuitu pahnihin an fanu pawngsuala puhna thubuai an thehluh hnuah man a ni ta a ni.
Police chuan Jodhpur, Rajasthan-a a ashram-a a pindan bikah hmeichhia hi ko lutin a pawngsual niin an sawi.
Guru hian sexy taka che vel tura a tih thin bakah a sawi chhuak a nih chuan an chhungkuaa thah vekah a vau bawk niin an sawi.
Guru thawhpui mi pahnih pawh thiam loh chantir niin kum 20 lung in tang tura hrem an ni.