Aizawl : Cheng nuai 918 senga sak, Thenzawl Auditorium chu nimin khan Tourism Minister Robert Romawia Royte-in a hawng a. Bul lo tantu bialtu MLA hmasa Lal Thanhawla chungah lawmthu a sawi.
Tourism Minister chuan Thenzawl Auditorium thar chu Chief Minister Zoramthanga’n, sorkar hmasate bul lo tan tawh hmasawnna hna tha te an chhunzawm tur thu a lo sawi tawh tihhlawhtlinna pakhat a nih thu a sawi a, Golf Course te leh thil dang tam tak chhunzawma an tihlawhtlin tawh thu thu sawiin, “ka lawm hle a ni”, a ti.
Tourism department chu department te tak te ni mahse, kum li chhungin, hripui karah pawh hmasawnna engemawzat an thawk ve nia a hriat thu Tourism Minister chuan a sawi a. External aided fund pawh Rs. vbc 1000 chu a thuphunga an hmuh tawh thu sawiin, a hmanna tur an duang chho mek niin a sawi. Sports Minister ni bawk Robert Romawia Royte chuan Thenzawl Badminton Club hnenah Court carpet a pek tur thu sawiin, Thenzawl HSS hnenah Football leh Net a pe nghal bawk.
Technical report-a a lan danin, Thenzawl Auditorium sakna tur sum chu chi hniha sanction niin, a building pui ber chu kum 2015 March-ah Rs. nuai 499.99 a sak tan a ni a, he sum hmang hian a building leh a tualzawl, building chhung electric zam fel te, tuizem leh hna dang te Contractor Zothankhuma, Zotlang, Aizawl-in thawkin, a ni hian ni 25.4. 2016 ah hna tanin, ni 30.3. 2019 ah a zo.
Hemi hnu hian hman theiha peih fel na turin Mizoramin Rs. nuai 417.56 a sanction leh a, ni 25. 8. 2018 atanga ni 6.5.2020 chhungin a building chhehvel leh a chhung cheibawlna hrang hrang; a hungna, a cheina, light leh sound system, chowkidar quarters leh store room bakah tul dangte thawh leh niin, heng hna hrang hrang te hi contractor parukin an thawk a ni.